శిక్షణ లేని టీచర్లు 10వేల మంది
- నిబంధనలకు విరుద్ధంగా నియామకాలు
- 2019లోగా శిక్షణ పొందాల్సిందే
ప్రజాశక్తి-అమరావతి బ్యూరో:
ప్రభుత్వ, ప్రైవేట్‌ పాఠశాలల్లో పనిచేసే ఉపాధ్యాయు లు తప్పనిసరిగా ఉపాధ్యాయ శిక్షణ పొందినవారై ఉండాలి. కానీ శిక్షణ లేని టీచర్లను కొనసాగిస్తూ ప్రైవేట్‌ పాఠశాలల యాజమాన్యాలు నాణ్యత లేని విద్యను విద్యార్థులకు బోధిస్తున్నాయి. కేంద్ర మానవ వనరుల శాఖ నిబంధనల ప్రకారం ఉపాధ్యాయ శిక్షణ పొందిన టీచర్లే పాఠశాలల్లో బోధించాలి. నిబంధనలకు విరుద్ధంగా ప్రైవేట్‌ పాఠశాలల యాజమాన్యాలు అర్హతలు లేని ఉపాధ్యాయుల్ని నియమిస్తూ విద్యార్థుల జీవితాలతో చెలగాటమాడుతున్నాయి. ఈ పరిస్థితి ప్రభుత్వ పాఠశాల ల్లోనూ ఉందంటే రాష్ట్రంలో విద్య పరిస్థితి ఏలా ఉందో, ప్రభుత్వానికి ఉన్న చిత్తశుద్ధి ఏమేరకు ఉందో అర్ధమవు తుంది. ప్రభుత్వ లెక్కల ప్రకారం ప్రభుత్వ పాఠశాలల్లో 5,149 మంది, ప్రైవేట్‌ పాఠశాలల్లో 5,236 మంది శిక్షణ పొందని టీచర్లు పనిచేస్తున్నారు. ఇక అనధికారికంగా ఈ లెక్క 40వేలకు పైగా ఉండే అవకాశం లేకపోలేదు. అధికారికంగా వారి సంఖ్యను చూపిస్తే నిబంధనల ప్రకారం వారికి ప్రయోజనాలు కల్పించాల్సి వస్తుందనే లెక్కలు చెప్పడం లేదు. దేశవ్యాప్తంగా అధికారిక లెక్కల ప్రకారం 11.09 లక్షల మంది శిక్షణ పొందని టీచర్లు పనిచేస్తుండగా, వీరిలో ప్రభుత్వ పాఠశాలల్లో 5,11,679 మంది, ప్రైవేట్‌ పాఠశాలల్లో 5,97,765 మంది ఉన్నారు.
విద్యాహక్కు చట్టం-2009 ప్రకారం ప్రస్తుతం పనిచేస్తున్న ఉపాధ్యాయులు 2018 మార్చి 31 లోపు శిక్షణ పొంది ఉండాలి. కానీ కేంద్ర ప్రభుత్వం ఈ కాలాన్ని మరోఏడాది పొడిగించింది. 2019 మార్చి నాటికి ప్రతి ఒక్కరూ శిక్షణ పొంది ఉండాలని ఇటీవల కేంద్ర మానవ వనరుల శాఖ నిబంధనను విధించింది. లేదంటే 2019 ఏప్రిల్‌ నుంచి అనర్హులుగా ప్రకటించనున్నట్లు స్పష్టం చేసింది.
శిక్షణ పొందని టీచర్లు నేషనల్‌ ఇన్‌స్టిట్యూట్‌ ఆఫ్‌ ఓపెన్‌ స్కూల్‌(ఎన్‌ఐఓఎస్‌) నుంచి డిప్లొమో ఇన్‌ ఎలిమెంటరీ ఎడ్యుకేషన్‌ సర్టిఫికేట్లను కచ్చి తంగా పొందాలి. ప్రభుత్వ లెక్కల ప్రకారం దేశ వ్యాప్తంగా 11.09 లక్షల మంది అర్హత లేకుండా బోధిస్తున్నారని లెక్కలు తేలగా, శిక్షణ కోసం 13,64,350 మంది దరఖాస్తు చేసుకున్నారు.
